Tafseer-e-Baghwi

فَهَزَمُوْهُمْ بِاِذْنِ اللّٰهِ١ۙ۫ وَ قَتَلَ دَاوٗدُ جَالُوْتَ وَ اٰتٰىهُ اللّٰهُ الْمُلْكَ وَ الْحِكْمَةَ وَ عَلَّمَهٗ مِمَّا یَشَآءُ١ؕ وَ لَوْ لَا دَفْعُ اللّٰهِ النَّاسَ بَعْضَهُمْ بِبَعْضٍ١ۙ لَّفَسَدَتِ الْاَرْضُ وَ لٰكِنَّ اللّٰهَ ذُوْ فَضْلٍ عَلَى الْعٰلَمِیْنَ

فَهَزَمُوْھُمْ : پھر انہوں نے شکست دی انہیں بِاِذْنِ اللّٰهِ : اللہ کے حکم سے وَقَتَلَ : اور قتل کیا دَاوٗدُ : داود جَالُوْتَ : جالوت وَاٰتٰىهُ : اور اسے دیا اللّٰهُ : اللہ الْمُلْكَ : ملک وَالْحِكْمَةَ : اور حکمت وَعَلَّمَهٗ : اور اسے سکھایا مِمَّا : جو يَشَآءُ : چاہا وَلَوْ : اور اگر لَا : نہ دَفْعُ : ہٹاتا اللّٰهِ : اللہ النَّاسَ : لوگ بَعْضَهُمْ : بعض لوگ بِبَعْضٍ : بعض کے ذریعہ لَّفَسَدَتِ : ضرور تباہ ہوجاتی الْاَرْضُ : زمین وَلٰكِنَّ : اور لیکن اللّٰهَ : اللہ ذُوْ فَضْلٍ : فضل والا عَلَي : پر الْعٰلَمِيْنَ : تمام جہان

تو طالوت کی فوج نے خدا کے حکم سے ان کو ہزیمت دی اور داؤد نے جالوت کو قتل کر ڈالا اور خدا نے ان کو بادشاہی اور دانائی بخشی اور جو کچھ چاہا سکھایا اور خدا لوگوں کو ایک دوسرے (پر چڑھائی اور حملہ کرنے) سے نہ ہٹاتا رہتا تو ملک تباہ ہوجاتا لیکن خدا اہل عالم پر بڑا مہربان ہے

(تفسیر) 251۔: (آیت)” فھزموھم باذن اللہ “۔ اللہ تعالیٰ کے علم کے ساتھ (آیت)” وقتل داؤد جالوت “۔ جالوت کے قتل کا بیان اس طرح ہے ، اہل تفسیر فرماتے ہیں طالوت کے ساتھ جن لوگوں نے نہر (دریا) کو عبور کیا تھا حضرت داؤد (علیہ السلام) کے والد ایشا بھی تھے جو اپنے تیرہ بیٹوں سمیت شریک تھے حضرت داؤد (علیہ السلام) ان تیرہ میں سے چھوٹے بیٹے تھے اور پتھر پھینکنے کا کام کیا کرتے تھے ۔ ایک دن انہوں نے باپ کو کہا اباجان ! میں جس کسی کو پتھر مارتا ہوں اسے گرا دیتا ہوں تو حضرت داؤد (علیہ السلام) کے والد نے کہا بیٹے خوش ہوجاؤ ، اللہ تعالیٰ نے تمہارا رزق اسی میں کیا ہے پھر ایک اور دفعہ اپنے والد کے پاس آئے اور کہا اباجان میں پہاڑوں میں داخل ہوا ، وہاں میں نے شیر کو گھٹنے کے بل بیٹھے دیکھا ، میں اس پر سوار ہوگیا اس کے دونوں کانوں کو میں نے پکڑا ، پس اس نے مجھے مضطرب نہ کیا ، والد نے کہا اباجان اس حال میں کہ میں پہاڑوں میں چل کر تسبیح کر رہا تھا تو ہر پہاڑ میرے ساتھ تسبیح کر رہا تھا ، باپ نے کہا خوش ہوجا میرے بیٹے یہ خیر ہے جو اللہ تعالیٰ نے تجھے عطا کی ہے پس جالوت نے طالوت کی طرف پیغام بھیجا کہ میرے سامنے اسے لاؤ جو مجھ سے لڑے ، پس اگر اس نے مجھے قتل کردیا تو میرا ملک تمہارے لیے اور اگر میں نے اسے قتل کردیا تو تمہارا ملک میرے لیے ، تو یہ شرط طالوت پر گراں گزری تو طالوت نے لشکر میں منادی کرا دی کہ جو جالوت کو قتل کرے گا میں اس کے نکاح میں اپنی بیٹی دوں گا اور اپنا آدھا ملک بھی ، پس لوگ جالوت سے ڈر گئے اور کسی نے اس آواز پر لبیک نہ کہا ۔ پس طالوت نے بنی اسرائیل کے نبی سے عرض کی کہ اللہ تعالیٰ سے دعا کریں ، چناچہ اللہ تعالیٰ کے نبی نے اس سلسلہ میں اللہ تعالیٰ سے دعا کی ، پس اس نبی کے پاس ایک سینگ لایا گیا جس میں تیل تھا اور ایک لوہے کا تنور اور کہا گیا کہ تمہارا وہ ساتھی جو جالوت کو قتل کرے گا وہ ہوگا جس کے سر پر یہ تیل والا سینگ رکھا جائے گا تو وہ تیل جوش مارے گا حتی کہ اس کا سر تیل والا ہوجائے گا اور اس کے چہرے پر وہ تیل نہیں بہے گا بلکہ اس کے سر پر تاج کی مانند رہے گا اور وہ شخص اس تنور میں داخل ہوگا تو اس تنور کو پورا فٹ ہو کر پر کر دے گا کھلا ہونے کی وجہ سے اس میں ہلے گا نہیں ، تو طالوت نے بنواسرائیل کے لوگوں کو بلا کر تجربہ کیا تو کوئی بھی اس میعار پر پورا نہ اترا تو اللہ تعالیٰ نے انکے نبی کی طرف وحی فرمائی کہ ایشا کی اولاد میں ایک ہے جس کے ذریعے اللہ تعالیٰ جالوت کو قتل فرمائیں گے تو طالوت نے ایشا کو بلایا ، پس کہا کہ میرے اوپر اپنی اولاد کو پیش کرو تو ایشا نے بارہ آدمی پیش کیے جو ستونوں کی طرح لمبے تڑنگے تھے ، طالوت ان میں سے ایک ایک کو سینگ پر پیش کرتا رہا تو ان میں سے کسی کے اندر مذکورہ علامت نہ دیکھی ۔ پس طالوت نے ایشا کو کہا کہ ان کے علاوہ بھی کوئی تیرا بیٹا باقی ہے ؟ اس نے کہا نہیں پس اللہ کے نبی نے بارگاہ خداوندی میں عرض کی کہ یا رب ! ایشا کا دعوی ہے کہ ان بارہ کے علاوہ اس کا کوئی بیٹا نہیں ہے ، پس اللہ تعالیٰ نے فرمایا ایشا نے جھوٹ بولا ، پس نبی نے فرمایا بیشک میرے رب نے تجھے جھٹلایا ہے پس ایشا نے کہا یا نبی اللہ ، اللہ تعالیٰ نے سچ فرمایا میرا ایک چھوٹا بیٹا ہے جسے داؤد کہا جاتا ہے ۔ میں نے اس بات سے شرم کی کہ لوگ اس کو دیکھیں کیونکہ وہ پست قد اور حقیر سا ہے ، پس کو بکریوں میں چھوڑ آیا ہوں جنہیں وہ چرا رہا ہے اور وہ فلاں فلاں گھاٹی میں ہے اور داؤد پست قد ، بہت بیمار ، زرد رنگ ، ٹیڑھی آنکھ والا فقیر آدمی تھا۔ اہم ملاحظہ : (حضرت داؤد (علیہ السلام) سے متعلق یہ عبارت قرآن وحدیث سے ماخوذ نہیں بلکہ اسرائیلی روایات پر مبنی ہے اور یہود (جو کہ مغضوب علیہم ہیں) نے انبیاء ومرسلین سے متعلق گستاخانہ اور غیر محقق باتیں درج کرکے ان کی شخصیت و کردار کو مجروح کیا ، لہذا حضرت داؤد (علیہ السلام) کی شکل ایسی نہ تھی جیسا کہ یہاں درج ہے بلکہ حضرت داؤد (علیہ السلام) انتہائی خوبصورت اور روشن چہرہ تھے اور اس کا ذکر حدیث شریف میں کچھ اس طرح ہے کہ حضرت آدم (علیہ السلام) پر ان کی اولاد پیش کی گئی تو حضرت داؤد (علیہ السلام) کے بارے میں ہے ” فاذا فیھم رجل اضواھم “۔ پس ان میں ایک آدمی تھا جو کہ ان میں زیادہ روشن تھا ۔ (منجانب مترجم) طالوت نے حضرت داؤد (علیہ السلام) کو بلایا کہا جاتا ہے بلکہ طالوت اس کی طرف نکلا ، حضرت داؤد (علیہ السلام) نے اس وادی کو پانی سے بہتے پایا جو اس کے اور اس کے باڑے کے درمیان حائل تھی جہاں شام کو بکریاں لے جاتا تھا ، طالوت نے حضرت داؤد (علیہ السلام) کو اس حال میں پایا کہ وہ دو بکریان اٹھائے وادی کے سیلابی ریلے کو عبور کر رہا ہے اور اس میں ڈوب نہیں رہا جب طالوت نے حضرت داؤد (علیہ السلام) کو دیکھا تو (جی میں) کہا کہ یقینا یہ وہی ہے جب یہ جانوروں پر مہربان ہے تو انسانوں پر زیادہ مہربان ہوگا ، طالوت نے حضرت داؤد (علیہ السلام) کو بلایا ، سینگ اس کے سر پر رکھا ، پس وہ بہہ پڑا ، پس طالوت نے کہا کہ کیا تجھے جالوت کے قتل کرنے میں دلچسپی ہے اس شرط پر کہ میں اپنی بیٹی تیرے نکاح میں دوں اور اپنے ملک میں تیری مہر جاری کر دوں (یعنی تیرا حکم چلے) حضرت داؤد (علیہ السلام) نے فرمایا ، ہاں ۔ طالوت نے کہا کہ کیا تو اپنے اندر کوئی ایسی شی محسوس کرتا ہے جس کی وجہ سے جالوت کے قتل کرنے میں تجھے جرات ہو ؟ حضرت داؤد (علیہ السلام) نے فرمایا ہاں وہ یہ کہ میں بکریاں چراتا ہوں پس شیر آتا ہے یا چیتا یا بھیڑیا وہ بکری لے جاتا ہے پس میں کھڑا ہوتا ہوں اور اس درندے کے جبڑے پھاڑ کر بکری نکال لیتاہوں چھڑا لیتا ہوں تو طالوت داؤد (علیہ السلام) کو لے کر اپنے لشکر میں گیا پس دؤد راستے میں ایک پتھر کے پاس سے گزرا تو اسے ایک پتھر نے آواز دی داؤد مجھے اٹھا لے میں ہارون (علیہ السلام) کا وہ پتھر ہوں جس سے ہارون فلاں فلاں بادشاہ کو قتل کیا تھا تو داؤد نے اس پتھر کو اپنے تھیلے میں رکھ لیا، پھر ایک پتھر کے اس سے گزرے تو اس نے آواز دی مجھے اٹھا لے ، میں وہ پتھر ہوں جس سے موسیٰ (علیہ السلام) نے فلاں فلاں بادشاہ کو قتل کیا ، پس داؤد (علیہ السلام) نے اسے اٹھا کر تھیلے میں رکھ لیا ، پھر ایک اور پتھر کے پاس سے گزرے تو اس نے آواز دی مجھے اٹھا لے میرے ذریعہ تو جالوت کو قتل کر دے گا تو حضرت داؤد (علیہ السلام) نے وہ پتھر اٹھا لیا اور اسے اپنے تھیلے میں رکھ لیا ، جب قتال کے لیے صف بندی ہوئی اور جالوت نمودار ہوا ۔ اور مقابلے کی دعوت دی ، حضرت داؤد (علیہ السلام) نے اس کے چیلنج کو قبول کیا ، طالوت نے حضرت داؤد (علیہ السلام) کو گھوڑا ، زرہ اور ہتھار دیئے حضرت داؤد (علیہ السلام) ہتھیار بند ہو کر گھوڑے پر سوار ہوئے تھوڑا کچھ چلے پھر بادشاہ کی طرف لوٹے ، بادشاہ نے حضرت داؤد (علیہ السلام) کو آتے دیکھا تو اپنے اردگرد کے لوگوں کو کہالڑکا بزدل ہوگیا، حضرت داؤد (علیہ السلام) آئے اور بادشاہ کے پاس آکر ٹھہر گئے طالوت نے پوچھا کیا ؟ حضرت داؤد (علیہ السلام) بولے اگر اللہ تعالیٰ نے میری نصرت نہ کی تو یہ ہتھیار مجھے کچھ فائدہ نہیں دے سکتے ، آپ مجھے چھوڑ دیں میں جالوت سے جس طرح چاہوں گا لڑوں گا ، طالوت نے کہا جو تمہارے جی میں آئے کیجئے ، حضرت داؤد (علیہ السلام) نے فرمایا ٹھیک ہے پس داؤد نے اپنے تھیلے کو لیا اسے اپنے گلے میں ڈالا اور گوپیا (پتھر پھینکنے کا ایک قدیم آلہ) ہاتھ میں لیا اور جالوت کی طرف چل پڑے اور جالوت سخت ترین اور قوی ترین انسان تھا اور اکیلے لشکروں کو شکست دیتا تھا اس کے خود مین تین سو رطل لوہا لگا ہوا تھا ۔ (قریبا 200 پونڈ) جب جالوت نے حضرت داؤد (علیہ السلام) کو دیکھا تو اللہ تعالیٰ جالوت کے دل میں رعب ڈال دیا اور جالوت نے کہا کہ آپ میرے مقابلہ میں آئے ہیں، حضرت داؤد (علیہ السلام) نے فرمایا ہاں جالوت ابلق (دورنگا) گھوڑے پر تھا اور اس پر مکمل ہتھیار تھے جالوت بولا تو میرے مقابلہ میں گوپیا اور پتھر لایا ہے جیسے کہ تو کتے کو (مارنے) آیا ہے، حضرت داؤد (علیہ السلام) بولے ہاں تو کتے سے بھی بدتر ہے ، جالوت نے کہا لازما میں تیرا گوشت زمین کے درندوں اور آسمانوں کے پرندوں میں تقسیم کروں گا ، حضرت داؤد (علیہ السلام) نے فرمایا بلکہ اللہ تعالیٰ تیرا گوشت تقسیم کرے گا ، پس حضرت داؤد (علیہ السلام) نے فرمایا ” باسم الہ ابراھیم “۔ ابراہیم کے معبود (برحق) کے نام کے ساتھ میں پتھر مارتا ہوں اور پتھر نکالا ، پھر دوسرا پتھر نکالا اور کہا ” باسم الہ اسحاق “۔ حضرت اسحاق (علیہ السلام) کے معبود کے نام کے ساتھ اور اسے اپنے گوپیا میں رکھا پھر تیسرا پتھر نکالا اور کہا ” باسم الہ یعقوب “ اور اس کو اپنے گوپیا ” فلاخن “ میں رکھا ، پھر یہ سب ایک پتھر بن گئے اور داؤد (علیہ السلام) نے اس ” فلاخن “ کو گھمایا اور اس پتھر کو مارا اللہ تعالیٰ نے ہوا کو حضرت داؤد (علیہ السلام) کے تابع کردیا حتی کہ وہ پتھر خود کے ناک والے حصہ پر لگا اور دماغ کو پار کرتا ہوا گدی کی طرف سے نکل گیا اور جالوت کے پیچھے تیس (30) آدمیوں کو قتل کردیا ، اللہ تعالیٰ نے جالوت کے لشکر کو شکست دی ، جالوت مقتول ہو کر گرا۔ حضرت داؤد (علیہ السلام) نے جالوت کو گھسیٹ کر طالوت کے سامنے لا پھینکا ، اس پر مسلمان بہت خوش ہوئے اور اپنے شہر کی طرف سلامتی کے ساتھ ملا غنیمت لے کر واپس لوٹ گئے ، حضرت داؤد (علیہ السلام) کی لوگوں میں شہرت ہوگئی ، حضرت داؤد (علیہ السلام) طالوت کے پاس تشریف لائے اور فرمایا اپنا وعدہ پورا کر، طالوت بولا تو بادشاہ کی بیٹی بغیر مہر کے لینا چاہتا ہے ، حضرت داؤد (علیہ السلام) نے فرمایا تو نے مجھ پر مہر کی شرط تو نہیں لگائی تھی اور میرے پاس کچھ ہے بھی نہیں ، طالوت نے کہا میں تجھے حسب طاقت تکلیف دوں گا تو دلیر آدمی ہے اور ہمارے بالمقابل ہمارے غیر مختون (جن کا ختنہ نہ ہوا ہو) دشمن ہیں جب تو نے ان میں سے دو سو آدمیوں قتل کردیئے اور ان کا قلفہ (ختنہ کرنے سے کٹا ہوا چمڑا) میرے پاس لے آیا میں تجھ سے اپنی بیٹی کا نکاح کر دوں گا پس حضرت داؤد (علیہ السلام) ان کے پاس آئے جب بھی ان میں سے کسی ایک کو قتل کرتے اس کے قلفہ کو تاگے میں پرو دیتے حتی کہ دو سو قلفہ پرو کر طالوت کے پاس لا کر پھینک دیئے اور فرمایا مجھے میری بیوی دو تو طالوت نے اپنی بیٹی کا نکاح کردیا اور اپنے ملک میں حضرت داؤد (علیہ السلام) کی مہر جاری کردی ، لوگوں کا میلان حضرت داؤد (علیہ السلام) کی طرف ہوگیا اور ان سے محبت کرنے لگے اور حضرت داؤد (علیہ السلام) کا ذکر زیادہ کرنے لگے ۔ طالوت کا حسد اور اس کی توبہ کا واقعہ : طالوت نے حضرت داؤد (علیہ السلام) پر حسد کیا اور قتل کا ارادہ کرلیا ، اس کی خبر طالوت کی بیٹی کو ایک آدمی نے دی جس کا نام ذوالعینین تھا تو طالوت کی بیٹی نے حضرت داؤد (علیہ السلام) کو کہا تو آج رات قتل کردیا جائے گا ، حضرت داؤد (علیہ السلام) بولے مجھے کون قتل کرے گا ؟ بیوی بولی میرا باپ ، حضرت داؤد (علیہ السلام) نے فرمایا کیا میں نے کوئی جرم کیا ہے ؟ طالوت کی بیٹی بولی مجھے ایسے شخص نے خبر دی ہے جو جھوٹ نہیں بولتا اور اس میں تو کچھ حرج نہیں ہے کہ آج رات تو چھپ جائے تاکہ اس کا مصداق دیکھے ، حضرت داؤد (علیہ السلام) بولے اگر طالوت یہ ارادہ کرچکا ہے تو میں نکلنے کی طاقت نہیں رکھتا ، لیکن میرے پاس شراب کا مشکیزہ لے آ ان کی بیوی لے آئی ، حضرت داؤد (علیہ السلام) نے وہ مشکیزہ اپنی چارپائی سونے کی جگہ پر رکھا اور خود چارپائی کے نیچے سو گئے ، طالوت آدمی رات کو داخل ہوا بیٹی سے کہا تیرا خاوند کہاں ہے ؟ بیٹی بولی وہ چارپائی پر سو رہا ہے ، تو طالوت نے تلوار کا ایک ہی وار کیا جس سے شراب بہہ پڑی ، جب شراب کی بو سونگھی تو طولات کہنے لگا اللہ تعالیٰ حضرت داؤد (علیہ السلام) پر رحم فرمائے وہ کس قدر شراب پیتا تھا اور نکل گیا جب صبح کو اسے معلوم ہوا کہ اس نے کچھ نہیں کیا پس کہا کہ آدمی (داؤد) سے میں نے طلب کیا (یعنی اس کو قتل کرنا) جو کچھ طلب کیا اب وہ اس بات کا حق دار ہے کہ مجھے اپنا بدلہ لیے بغیر نہ چھوڑے ، چناچہ طالوت نے اپنے حفاظتی انتظام سخت کردیئے ، دروازے بند کردیئے ، پھر بیشک داؤد طالوت کے پاس اس حال میں آیا کہ آنکھیں سکون پذیر ہوچکی تھی (سوچکی تھیں) پس اللہ تعالیٰ نے دربانوں کو اندھا کردیا حضرت داؤد (علیہ السلام) نے دروازے کھولے اور طالوت پر داخل ہوئے وہ اپنے بستر پر سویا ہوا تھا ، پس حضرت داؤد (علیہ السلام) نے ایک تیر اس کے سر کے پاس رکھا اور ایک تیر پاؤں کی طرف اور ایک تیر بائیں طرف رکھا پھر نکل گئے ، جب طالوت جاگا تیروں کو دیکھا پہچان گیا ، پس کہا اللہ تعالیٰ داؤد پر رحم فرمائے وہ مجھ سے بہتر ہے ، میں اس پر کامیاب ہوا تو میں نے اس کے قتل کا ارادہ کیا ، وہ مجھ پر کامیاب ہوا تو مجھ سے رک گیا (مجھے کچھ نہ کہا) اگر وہ چاہتا تو یہ تیر میرے حلق میں چبھو سکتا تھا ، اب میں اس سے حالت امن میں نہیں ، جب آیندہ رات آئی حضرت داؤد (علیہ السلام) دوبارہ تشریف لائے، اللہ تعالیٰ نے دربانوں کو اندھا کردیا ، پس حضرت داؤد (علیہ السلام) داخل ہوئے طالوت سویا ہوا تھا ، حضرت داؤد (علیہ السلام) نے طالوت کا وہ لوٹا لیا جس سے وہ وضو کرتا تھا اور وہ ڈنڈی دار پیالہ لیا جس میں وہ پیتا تھا اور اس کی داڑھی کے چند بال کترے اور کچھ حصہ اس کے کپڑوں کا کاٹا پھر نکل گئے ۔ اور بھاگ گئے اور چھپ گئے ، جب طالوت نے صبح یہ صورت حال دیکھی تو حضرت داؤد (علیہ السلام) پر جاسوس مقرر کیے اور تلاش وطلب کو سخت تر کردیا مگر اس پر وہ قادر نہ ہوسکا، پھر بیشک ایک دن طالوت سوار ہوا داؤد کو پایا کہ وہ جنگل میں چل رہے ہیں پس (دل میں) کہا آج کے دن میں اس کو ضرور قتل کروں گا ، پس حضرت داؤد (علیہ السلام) کے پیچھے گھوڑا دوڑایا ، حضرت داؤد (علیہ السلام) بھی دوڑے ، حضرت داؤد (علیہ السلام) جب خوف زدہ ہوتے (تو اس قدر دوڑتے کہ) انکو پکڑا نہ جاسکتا تھا ، پس غار میں داخل ہوگئے، اللہ تعالیٰ نے مکڑے کو حکم دیا اس نے غار پر جالا تن دیا جب طالوت اس غار تک پہنچا مکڑے کا جالا دیکھا ، کہا اگر داؤد یہاں داخل ہوتا تو مکڑے کی یہ بنا ٹوٹ جاتی ، پس اسے چھوڑا اور چلا گیا ، حضرت داؤد (علیہ السلام) چلے اور عبادت گزاروں کے ہمراہ پہاڑ کو آئے ۔ وہاں مصروف عبادت ہوگئے ، علماء اور عابدوں نے طالوت پر حضرت داؤد (علیہ السلام) کے معاملے میں طعن کیا ، پس طالوت کا یہ حال ہوگیا کہ جو کوئی اسے داؤد کے قتل سے منع کرتا وہ اس منع کرنے والے کو قتل کردیتا اور علماء کے قتل پر لوگوں کو ابھارا۔ چناچہ بنی اسرائیل کے جس عالم پر اس کا بس چلتا اسے قتل کردیتا ۔ حتی کہ اس کے پاس ایک عورت لائی گئی جو اسم اعظم جانتی تھی ، طالوت نے اپنے روٹی پکانے والے کو حکم دیا کہ اس عورت کو قتل کر دے ، روٹی پکانے والے کو اس پر رحم آگیا اور کہا شاید ہمیں کبھی کسی وقت عالم کی ضرورت پڑے ، چناچہ اس عورت کو قتل نہ کیا ، طالوت کے دل میں توبہ کے جذبات ابھرے اپنے کیے پر نادم ہوا اور رونا شروع کردیا حتی کہ لوگوں کو اس پر ترس آگیا ، ہر رات قبرستان نکل جاتا روتا اور آوازیں دیتا میں اس شخص کو اللہ تعالیٰ کا واسطہ دیتا ہوں جو میری توبہ کے بارے میں جانتا ہو کہ وہ مجھے ضرور توبہ کے بارے میں خبر دے، جب مرنے والوں پر اس نے چیخ و پکار زیادہ کی تو قبر والوں سے ایک آواز ادینے والے نے آواز دی کیا تو ہمیں قتل کرنے پر راضی نہیں ہوا کہ مرنے کے بعد ہمیں ایذاء دینے آگیا ، اس پر طالوت کا رونا اور حزن وملال اور زیادہ ہوگیا ۔ روٹی پکانے والے (جس کو طالوت نے عالمہ عورت کو قتل کرنے کا حکم دیا تھا اور اس نے قتل نہیں کیا تھا) کو طالوت پر رحم آگیا اس نے کہا بادشاہ سلامت آپ کو کیا ہوا ؟ طالوت نے کہا روئے زمین پر تو کوئی ایسا بادشاہ جانتا ہے جو مجھے یہ بتائے کہ کیا میری توبہ قبول ہونے کی کوئی صورت ہے ؟ پس روٹی پکانے والے نے کہا کہ اے بادشاہ ! تیری مثال تو اس بادشاہ کی سی ہے جو بوقت عشاء ایک قصبہ میں اترا تو ایک مرغے نے آواز کی ، بادشاہ نے اس سے بری فال لی اور حکم دیا کہ اس قصبہ میں جتنے مرغے ہیں سب کو ذبح کردیا جائے، پھر جب سونے کا ارادہ کیا تو کہنے لگا کہ جب صبح سویرے مرغا اذان دے تو مجھے جگا دینا تاکہ ہم سویرے سویرے نکل چلیں تو لوگوں نے کہا تو نے کوئی مرغا چھوڑا ہے جس کی آواز (اذان) ہم سنیں ؟ اسی طرح تو نے بھی کوئی عالم زمین پر چھوڑا ہے ؟ (جس سے ہم توبہ کے بارے میں پوچھیں) اس پر طالوت کا غم اور رونا اور بڑھ گیا ، جب روٹی پکانے والے نے طالوت کی یہ حالت دیکھی تو کہا مجھے خبر دے اگر میں تجھے کسی عالم پر دلالت کروں شاید تو اس کو قتل کر ڈالے ، طالوت نے کہا نہٰں تو خباز نے اس پر اعتماد کیا اور اسے خبر دی کہ عالم عورت اس پاس ہے ۔ طالوت نے کہا مجھے اس کے پاس لے چل ، میں اس سے پوچھوں کہ میرے لیے کوئی توبہ کی صورت ہے اور وہ عورت اس خاندان سے تھی جس کے مرد اسم اعظم جانتے تھے جب اس خاندان کے مرد مرگئے تو عورتوں نے اسم اعظم سیکھ لیا جب طالوت دروازہ پر پہنچا ۔ خباز (روٹی پکانے والے) نے کہا بیشک اگر اس عورت نے تجھے دیکھ لیا تو گھبرا جائے گی بلکہ تو میرے پیچھے پیچھے آ ، پھر وہ دونوں عورت کے پاس آئے، پس خباز (روٹی پکانے والے) نے کہا کہ کیا میں تمام لوگوں سے بڑھ کر تجھ پر احسان کرنے والا نہیں ، میں نے تجھے قتل سے بچایا اور تجھے پناہ دی ؟ عورت نے کہا بیشک ایسے ہی ہے خباز نے کہا میرے لیے تیری طرف ایک حاجت ہے یہ طالوت حاضر ہے ، پوچھتا ہے کہ کیا میری توبہ کی کوئی صورت ہے ؟ اس عورت پر خوف کی وجہ سے غشی طاری ہوگئی ، خباز نے کہا طالوت تیرے قتل کا ارادہ نہیں رکھتا بلکہ صرف یہ پوچھتا ہے کہ اس کی توبہ کی کوئی صورت ہے ؟ عورت نے کہا نہیں ، اللہ کی قسم ! میں طالوت کے لیے توبہ قبول ہونے کی کوئی صورت نہیں جانتی ، البتہ میں نبی کی قبر کی جگہ جانتی ہوں تو وہ عورت ان دونوں کو لے کر حضرت اشمویل (علیہ السلام) کی قبر پر لے گئی ۔ پس وہاں نماز پڑھی اور دعا کی ، پھر آواز کی یا صاحب القبر اے قبر والے ! پس حضرت شمویل (علیہ السلام) مٹی سے اپنے سر کو جھاڑتے ہوئے قبر سے نکلے ، پس ان تینوں کو دیکھتے ہی بولے تمہیں کیا ہوا ؟ کیا قیامت قائم ہوگئی ؟ عورت نے کہا نہیں بلکہ طالوت پوچھتا ہے کیا اس کی توبہ کی کوئی صورت ہے ؟ شمویل (علیہ السلام) نے کہا طالوت تو نے میرے بعد کیا کیا ؟ طالوت بولا میں نے کوئی بری چیز نہیں چھوڑی جس کو میں نے نہ کیا ہو ، اب میں توبہ کا طلبگار ہو کر آیا ہوں ، شمویل (علیہ السلام) نے کہا تیرے عیال کتنے ہیں یعنی تیری اولاد کتنی ہے ؟ اس نے کہا دس مرد ہیں ، حضرت شمویل (علیہ السلام) نے فرمایا تیری توبہ کی صرف ایک صورت ہے کہ تو ملک یعنی سلطنت چھوڑ دے اور تو خود بمع اولاد کے نکل جا اور فی سبیل قتال کر ، پھر تو اولاد کو اپنے آگے بھیجے وہ تیرے سامنے شہید ہوجاویں ، پھر تو اکیلا لڑے حتی کہ آخر میں تو قتل ہوجائے ، پھر حضرت شمویل (علیہ السلام) قبر کی طرف واپس لوٹے اور فوت ہوگئے ، طالوت پہلے سے زیادہ غمناک ہو کر واپس ہوا ، اس ڈر کی وجہ سے کہ اس کی اولاد شاید اس کی پیروی نہ کرے ، رویا حتی کہ پلکیں گرگئیں ، جسم کمزور ہوگیا، اولاد اس کے پاس آئی ، پوچھا تو طالوت نے اولاد سے کہا مجھے یہ بتاؤ اگر میں آگ میں دھکیلا جاؤں تو کیا تم میری جگہ قربانی دو گے ؟ انہوں نے کہا کیوں نہیں ، ہم حتی المقدور قربانی دیں گے، طالوت بولا پس تحقیق وہ صورت حال آگ ہی ہے اگر تم وہ کچھ نہیں کرو گے جو کچھ میں تمہیں کہوں ، اولاد نے کہا ارشاد فرمائیں تو طالوت نے پورا واقعہ کہہ سنایا اولاد بولی تو کیا واقعی آپ قتل ہونے والے ہیں ؟ طالوت بولا ہاں ، اولاد نے کہا پھر آپ کے بعد ہماری زندگی میں بھی کوئی خیر نہیں ہے ، بیشک آپ جو کچھ ہم سے مطالبہ فرماتے اسے خوش دلی سے ہم قبول کرتے ہیں، پس طالوت نے مال اولاد سمیت تیاری کی ، چناچہ اس کے دس بیٹے اس راہ میں ختم ہوگئے اس کے سامنے لڑے حتی کہ قتل ہوگئے ، ان کے بعد طالوت نے قتال کے لیے حملہ کیا حتی کہ شہید ہوگیا ، پس طالوت کا قاتل حضرت داؤد (علیہ السلام) کے پاس آیا تاکہ حضرت داؤد (علیہ السلام) کو خوشخبری دے اور کہا اے داؤد میں نے تیرے دشمن کو قتل کردیا حضرت داؤد (علیہ السلام) نے فرمایا تو بھی پھر زندہ رہنے کے لائق نہیں ، حضرت داؤد (علیہ السلام) نے اس کی گردن ماری ، طالوت کا ملک اس کے قتل ہونے تک چالیس سال تک رہا ، بنی اسرائیل حضرت داؤد (علیہ السلام) کے پاس آئے اور انہیں طالوت کے خزانے دئیے اور اپنا بادشاہ مقرر کیا ، کلبی (رح) اور ضحاک (رح) کہتے ہیں کہ طالوت کے قتل ہونے کے بعد حضرت داؤد (علیہ السلام) سات سال بادشاہ رہے اور سوئے حضرت داؤد (علیہ السلام) کے بنی اسرائیل کبھی بھی ایک بادشاہ پر جمع نہیں ہوئے، پس یہ ہے ” واتاہ اللہ الملک والحکمۃ “ یعنی نبوت ، اللہ تعالیٰ نے حضرت داؤد (علیہ السلام) کے لیے بادشاہت اور نبوت جمع فرما دی حالانکہ اس سے پہلے کبھی ایسا نہیں ہوا، بادشاہت ایک خاندان میں ہوتی تھی اور نبوت ایک خاندان میں بعض حضرات نے کہا کہ ملک اور حکمت سے مراد علم مع العمل ہے ” وعلمہ مما یشائ “ کلبی (رح) وغیرہ کہتے ہیں کہ اس علم سے مراد زرہ سازی کی صنعت ہے، زرہیں بناتے اور بیچتے اور صرف اپنے ہاتھ کی کمائی سے کھاتے اور کہا گیا ہے کہ اس علم سے مراد پرندوں کی بولی، بڑی اور چھوٹی چیونٹی کی کلام کا علم دیا تھا اور اسی طرح ہر وہ جانور جس کی آواز بھی نہیں ۔ بعض نے کہا کہ اس سے مراد زبور ہے اور بعض نے کہا کہ اس سے مراد اچھی آواز اور خوش الحانی ہے ، اللہ تعالیٰ نے حضرت داؤد (علیہ السلام) کے بعد کسی کو ایسی خوش الحانی عطا نہیں کی ، حضرت داؤد (علیہ السلام) جب زبور کی تلاوت فرماتے تو پرندے قریب ہوجاتے حتی کہ ان کی گردنوں کو پکڑا جاتا ، پرندے سایہ کرتے ، بہتا پانی رک جاتا ، ہوا ٹھہر جاتی ، ضحاک (رح) نے حضرت سیدنا عبداللہ بن عباس ؓ سے روایت کی کہ (آیت)” علمہ مما یشائ “ سے مراد یہ ہے کہ اللہ تعالیٰ نے حضرت داؤد (علیہ السلام) کو ایک زنجیر دی تھی ، جو ثریا سے ملی ہوئی تھی اور اس کا سرا آپ کے صومعہ (عبادت خانہ) کے ساتھ ملا ہوا تھا ، اس میں لوہے کی سی طاقت ، آگ کی رنگت تھی ، گول کڑیاں جواہر جڑی اور تازہ لؤلؤ کی لڑیوں سے میخ زدہ تھیں ، ہو اس میں جو کوئی حادثہ رونما ہوا اور زنجیر بجتی اور حضرت داؤد (علیہ السلام) کو علم ہوجاتا جو کوئی آفت زدہ انسان اس کو چھوتا تو صحت مند ہوجاتا اور حضرت داؤد (علیہ السلام) کے بعد بنی اسرائیل والے اپنا فیصلہ اس زنجیر کے پاس لے جاتے ، یہاں تک کہ وہ زنجیر اٹھالی گئی ۔ پس جو کوئی کسی پر زیادتی کرتا یا کسی کے حق دینے کا انکار کرتا تو اس زنجیر کے پاس آتا ۔ اگر سچا ہوتا تو اس کا ہاتھ زنجیر کو لگ جاتا اور جو کوئی جھوٹا ہوتا اس کو نہ چھو سکتا ، یہ صورت حال اسی طرح رہی یہاں تک کہ بنی اسرائیل میں مکر اور دھوکہ بازی شروع ہوگئی ، پس ہمیں یہ بات پہنچی ہے کہ ایک بادشاہ نے کسی آدمی کے پاس قیمتی موتی امانت رکھا، جب واپسی کا مطالبہ کیا تو وہ شخص مکر گیا تو وہ دونوں اپنا جھگڑا زنجیر کے پاس لے گئے ، پس جس شخص کے پاس موتی امانت تھا اس نے لاٹھی میں سوارخ کرکے وہ موتی اس لاٹھی میں ڈال دیا اور اس لاٹھی پر سہارا لگا کر زنجیر کو حاضر ہوگئے ، پس موتی والے نے کہا میرا موتی واپس کر جو تیرے پاس امانت تھا ، دوسرے نے کہا میں تو نہیں جانتا کہ تیری کوئی امانت میرے پاس ہے اور کہا اگر تو دعوی میں سچا ہے تو اس زنجیر کو ہاتھ لگا تو موتی کی امانت کا مطالبہ کرنے والے نے ہاتھ لگایا تو اس کا ہاتھ زنجیر کو لگ گیا پھر منکر کو کہا گیا کہ تو زنجیر کو ہاتھ لگا تو منکر امانت نے صاحب جو ہرہ (موتی) کو کہا کہ میری یہ لاٹھی پکڑتا کہ میں زنجیر کو ہاتھ لگاؤں تو لاٹھی مالک جو ہرہ نے لے لی ، پھر منکر کھڑا ہوا اور زنجیر کو پکڑ لیا اور کہا یا اللہ ! اگر تو جانتا ہے کہ یہ مدعی جس امانت کا دعوی کرتا ہے وہ امانت اس کے پاس پہنچ چکی ہے تو یہ زنجیر میرے قریب کر دے، پس ہاتھ لمبا کیا اور زنجیر کو لے لیا ، پس قوم نے تعجب کیا اور اس زنجیر کے معاملہ میں شک کرنے لگے ۔ پس انہوں نے اس حال میں صبح کی کہ اللہ تعالیٰ نے زنجیر کو اٹھا لیا تھا ۔ (آیت)” ولولا دفع اللہ الناس بعضھم ببعض “۔ اہل مدینہ اور یعقوب نے (دفاع اللہ) الف کے ساتھ پڑھا یہاں بھی اور سورة حج میں بھی اور باقیوں نے بغیر الف کے پڑھا اس لیے کہ اللہ تعالیٰ کے ساتھ کوئی بھی فعل میں مغالبہ و مقابلہ نہیں کرسکتا (کہ مدافعت میں کوئی مقابلہ کرے اور باب مفاعلہ سے اس کا ذکر کیا جائے) بلکہ اللہ تعالیٰ اکیلا دافع ہے اور جس نے الف کے ساتھ پڑھا اس کا جواب یہ ہے کہ دفاع کا عمل کبھی یکطرفہ بھی ہوتا ہے جیسا کہ اہل عرب کا قول ہے ” احسن اللہ عنک الدفاع “ (اب اس جملہ میں دفاع بمعنی دفع ہے) ابن مجاہد (رح) فرماتے ہیں کہ اگر اللہ تعالیٰ عساکر مسلمین کے ذریعے مشرکوں کو دفع نہ فرماتے تو مشرک لوگ زمین پر غالب آجاتے اور مساجد اور شہروں کو ویران کر ڈالتے اور ایمان والوں کو قتل کردیتے اور باقی مفسرین نے فرمایا اگر اللہ تعالیٰ ایمان والوں اور نیکوں کے ذریعے کفار وفجار کو دفع نہ فرماتے تو زمین اپنے باسیوں سمیت تباہ ہوجاتی لیکن ۔

Top