Urwatul-Wusqaa

وَ : اور مِنْ : سے (کچھ) اٰبَآئِهِمْ : ان کے باپ دادا وَذُرِّيّٰتِهِمْ : اور ان کی اولاد وَاِخْوَانِهِمْ : اور ان کے بھائی وَاجْتَبَيْنٰهُمْ : اور ہم نے چنا انہیں وَهَدَيْنٰهُمْ : اور ہم نے ہدایت دی انہیں اِلٰى : طرف صِرَاطٍ : راستہ مُّسْتَقِيْمٍ : سیدھا

اور ان کے آباؤاجداد اور ان کی نسل اور ان کے بھائی بندوں میں سے بھی کتنوں ہی کو ہم نے برگزیدہ کیا تھا اور سیدھی راہ ان پر کھول دی تھی

جن انبیائے کرام کا نام بنام ذکر کیا گیا ان کے آباؤ اور بھائی بندوں میں بھی برگزیدہ لوگ تھے : 134: انبیاء کرام اور رسل عظام تو اللہ تعالیٰ کے مقبول اور برگزیدہ بندے ہوتے ہی ہیں اور ان پر رحمت الٰہی کے سمندر کا جو جوش ہوتا ہے وہ تو معروف ہی ہے لیکن کچھ ایسے لوگ بھی ہوتے ہیں جو نہ نبی ہوتے ہیں اور نہ رسول لیکن ان کے درجات کی بلندی کا بھی کون اندازہ کرسکتا ہے اور جو اللہ کے ہاں پسندیدہ ہوگیا اور اللہ کے ہاں اس کا ہدایت یافتہ ہونا قبول کرلیا گیا وہ اگرچہ نبی و رسول تو نہ ہوئے لیکن اللہ تعالیٰ کے انعام یافتہ بندے تو ضرور قرار پاگئے اور ان کو انبیائے کرام کا سنگ اور ساتھ یقیناً مل گیا اور اگر وزیر اعظم یا صدر مملکت کے خاص آدمی ہونے کے شرف تسلیم ہے تو اللہ تعالیٰ کے ان بندوں اور اللہ کے رسولوں کے ساتھ رہنے والوں کی بزرگی سے کون انکار کرسکتا ہے ؟ ان لوگوں کو جو ہدایت ہوئی ہے وہ ہدایت بھی مخفی ایزدی کی جلوہ طرازی ہے اور جس پر اس کی نگاہ لطف و کرم پڑگئی وہ ہدایت یافتہ ہوگیا۔ بلاشبہ ان لوگوں کی ہر حرکت اپنے رسول کے بتائے ہوئے طریقے کے مطابق ہوتی ہے ان کو کسی بات کا دعویٰ نہیں ہوتا۔ ان کی منکسر المزاجی ضرب المثل ہوتی ہے۔ تصنع و بناوٹ کا وہاں گزر نہیں ہوتا۔ بلاشبہ وہ گل مشک ہوتے ہیں اور ان کی خوشبو سے ایک جہاں معطر ہوتا ہے۔ زیر نظر آیت میں انہی لوگوں کا ذکر کیا گیا ہے اور وہ ہمیشہ راہ مستقیم پر چلتے ہیں اور ادھر ادھر کی راہوں میں وہ گم نہیں ہوتے۔

Top