تدبرِ قرآن
Tadabbur-e-Quran · 40. Al-Ghaafir · Ayah 10
اِنَّ الَّذِیْنَ كَفَرُوْا یُنَادَوْنَ لَمَقْتُ اللّٰهِ اَكْبَرُ مِنْ مَّقْتِكُمْ اَنْفُسَكُمْ اِذْ تُدْعَوْنَ اِلَى الْاِیْمَانِ فَتَكْفُرُوْنَ﴿10﴾
- اِنَّ الَّذِيْنَ كَفَرُوْابیشک۔ جن لوگوں نے۔ کفر کیا
- يُنَادَوْنَوہ پکارے جائیں گے
- لَمَقْتُ اللّٰهِالبتہ اللہ کا بیزار ہونا
- اَكْبَرُبڑا
- مِنْسے
- مَّقْتِكُمْتمہارا بیزار ہونا
- اَنْفُسَكُمْاپنے تئیں
- اِذْجب
- تُدْعَوْنَتم بلائے جاتے تھے
- اِلَى الْاِيْمَانِایمان کی طرف
- فَتَكْفُرُوْنَتو تم کفر کرتے تھے
اصل صورت حال جس سے جھوٹی شفاعت پر تکیہ کرنے والوں کو سابقہ پیش آئے گا
یعنی یہ لوگ تو امید لگائے بیٹھے ہیں کہ ان کے سفارشی ان کو اللہ کے ہاں اونچے سے اونچے درجے دلوائیں گے لیکن وہاں ان کو منادی کے ذریعہ سے یہ آگاہی دی جائے گی کہ آج جتنا غم و غصہ تم کو اپنی بدبختی و محرومی اور اپنے لیڈروں کی کج اندیشی و ضلالت پر ہے اس سے زیادہ تمہارے حال پر غصہ و غضب خدا کو اس وقت تھا جب کہ تم کو رسول کے ذریعہ سے ایمان کی دعوت دی جاتی تھی اور تم نہایت رعونت کے ساتھ دعوت کو ٹھکراتے تھے۔ مطلب یہ ہے کہ اب اپنی اس رعونت اور خدا کے اس غصہ و غضب کا انجام بھگتو اور اپنی بدبختی پر اپنے سر پیٹو۔ اب یہاں کوئی تمہاری مدد کرنے والا نہیں ہے۔ یہ جو کچھ تمہارے سامنے آیا ہے اللہ کی طرف سے اتمام حجت کے بعد آیا ہے اس وجہ سے تم اسی کے سزاوار ہو۔
’ اذ تدعون الی الایمان ‘ ظرف ہے ’ لمقت اللہ اکبر ‘ کا۔ ’ ایمان ‘ سے خاص طور پر توحید پر ایمان مراد ہے۔ اس لئے کہ خدا کے ہاں معتبر ایمان وہی ہے جو توحید کے ساتھ ہو۔ سورة زمر آیت 45 میں یہ بات بیان ہوچکی ہے کہ منکرین آخرت کو سب سے زیادہ چڑ توحید کی دعوت سے ہے۔ یہاں بھی آگے والی آیت میں وضاحت فرما دی گئی ہے کہ اللہ تعالیٰ کا یہ غصہ ان پر اس وجہ سے ہوگا کہ جب ان کو توحید کی دعوت دی جاتی تو اس سے بد کتے اور شرک کو بڑی خوش دلی سے قبول کرتے۔ ذلکم بانہ اذا دعی اللہ وحدہ کفرتم ج وان یشرک بہ تومنوا ط فالحکم للہ العلی الکبیر ‘ (82) (یہ سب تمہیں اس وجہ سے پیش آیا کہ جب اللہ واحد کی دعوت دی جاتی تو تم اس کا انکار کرتے اور جب اس کے شریک ٹھہرائے جاتے تو تم مانتے تو اب تو فیصلہ خدائے بلندو عظیم ہی کے اختیار میں ہے)۔