تدبرِ قرآن
Tadabbur-e-Quran · 23. Al-Muminoon · Ayah 62
وَ لَا نُكَلِّفُ نَفْسًا اِلَّا وُسْعَهَا وَ لَدَیْنَا كِتٰبٌ یَّنْطِقُ بِالْحَقِّ وَ هُمْ لَا یُظْلَمُوْنَ﴿62﴾
- وَلَا نُكَلِّفُاور ہم تکلیف نہیں دیتے
- نَفْسًاکسی کو
- اِلَّامگر
- وُسْعَهَااس کی طاقت کے مطابق
- وَلَدَيْنَااور ہمارے پاس
- كِتٰبٌایک کتاب (رجسٹر)
- يَّنْطِقُوہ بتلاتا ہے
- بِالْحَقِّٹھیک ٹھیک
- وَهُمْاور وہ (ان)
- لَا يُظْلَمُوْنَظلم نہ کیے جائیں گے (ظلم نہ ہوگا)
اہل ایمان کو ایک بشارت
یہ بطور جملہ معترضہ اہل ایمان کے لئے اسی طرح کی بشارت اور تسلی ہے جس طرح کی بشارت بقرہ کی آخری آیت میں گزر چکی ہے۔ یعنی ہرچند ہے تو یہ امتحان سخت لیکن اہل ایمان اطمینان رکھیں کہ ہم اپنی راہ میں مسابقت کرنے والوں کو کسی ایسے امتحان میں نہیں ڈالتے جو ان کی طاقت سے زیادہ ہو اور یہ اطمینان بھی رکھیں کہ وہ ہماری راہ میں جو مشقت بھی جھیلیں گے خواہ وہ چھوٹی ہو یا بڑی وہ ہمارے پاس ایک رجسٹر میں درج ہوتی ہے، وہ رجسٹر جزائے اعمال کے دن، ہر ایک کی تمام اعمال کا پورا پورا ریکارڈ، بالکل ٹھیک ٹھیک پیش کر دے گا اور ہر شخص اس کے مطابق اپنے ہر عمل کا صلہ پائے گا، کسی کی ذرہ برابر بھی کوئی حق تلفی نہ ہوگی۔