Dure-Mansoor - 6 : 74

وَاِذْ : اور جب قَالَ : کہا اِبْرٰهِيْمُ : ابراہیم لِاَبِيْهِ : اپنے باپ کو اٰزَرَ : آزر اَتَتَّخِذُ : کیا تو بناتا ہے اَصْنَامًا : بت (جمع) اٰلِهَةً : معبود اِنِّىْٓ : بیشک میں اَرٰىكَ : تجھے دیکھتا ہوں وَقَوْمَكَ : اور تیری قوم فِيْ ضَلٰلٍ : گمراہی مُّبِيْنٍ : کھلی

اور جب ابراہیم نے اپنے باپ آذر سے کہا کیا تو بتوں کو معبود مانتا ہے ؟ بلاشبہ میں تجھے اور تیری قوم کو کھلی گمراہی میں دیکھ رہا ہوں۔

(1) امام ابن ابی حاتم اور ابو الشیخ نے ابن عباس ؓ سے روایت کیا کہ آزر بت ہے۔ اور ابراہیم کے والد کا نام یازر تھا۔ آپ کی ماں کا نام مثلی تھا۔ آپ کی بیوی کا نام سارہ تھا۔ اور آپ کی باندی اسماعیل (علیہ السلام) کی والدہ کا نام ھاجرہ تھا اور داؤد بن امین تھے اور نوح بن لمک تھے اور یونس بن متی تھے۔ (2) امام ابن ابی شیبہ، عبد بن حمید، ابن جریر، ابن منذر اور ابن ابی حاتم نے مجاہد (رح) سے روایت کیا کہ آزر ان کا باپ نہیں ہے لیکن یہ ایک بت کا نام ہے۔ (3) امام ابن ابی حاتم نے یسری (رح) سے روایت کیا کہ ابراہیم کے باپ کا نام تارح تھا۔ اور بت کا نام آزر تھا۔ (4) امام ابن ابی منذر نے ابن جریج (رح) سے روایت کیا کہ لفظ آیت واذقال ابراہیم لابیہ ازر میں آزر آپ کا باپ نہیں ہے بلکہ یہ ایک بت ہے۔ لیکن لفظ آیت اذقال ابراہیم لابیہ آزر میں وہ معبود (باطل) مراد ہیں۔ اور یہ نزول قرآن سے پہلے کا ہے اور حضرت ابراہیم (علیہ السلام) تو ابراہیم بن تیرح ہیں۔ (5) امام ابن جریر اور ابن ابی حاتم نے سلمان التیمی سے روایت کیا کہ انہوں نے یوں پڑھا لفظ آیت واذقال ابراہیم لابیہ آزر مجھ کو یہ بات پہنچی ہے کہ یہ کلمات سخت ہیں اور یہ بدترین کلمات ہیں جو ابراہیم نے اپنے والد (یعنی چچا) کو کہے۔ (6) امام ابن ابی حاتم اور ابو الشیخ نے ابن عباس ؓ سے روایت کیا کہ انہوں نے لفظ آیت واذقال ابراہیم لابیہ آزر اتتخذ اصناما الھۃ کے بارے میں فرمایا وہ کہتا تھا میں مدد کرتا ہوں کیا تو اللہ کو چھوڑ کر بتوں سے مدد مانگا کرتا ہے۔ ایسا مت کر اور وہ فرماتے تھے کہ ابراہیم کے والد کا نام آزر نہیں تھا۔ اس کا نام تارح تھا ابو ذرعہ (رح) نے کہا کہ آزر دو ہمزوں کے ساتھ ہے یعنی اء زر۔ (7) امام ابو الشیخ نے ضحاک (رح) سے روایت کیا کہ انہوں نے اس آیت کے بارے میں فرمایا کہ آزر ابراہیم کے والد تھے۔

Top