حضرت ابوایوب انصاری ؓ کی مرویات
مرثد بن عبداللہ یزنی (رح) کہتے ہیں کہ ہمارے یہاں مصر میں نبی کریم ﷺ کے صحابی حضرت ابوایوب انصاری ؓ جہاد کے سلسلے میں تشریف لائے اس وقت حضرت امیر معاویہ ؓ نے ہمارا امیر حضرت عقبہ بن عامر جہنی ؓ کو مقرر کیا ہوا تھا، ایک دن حضرت عقبہ ؓ کو نماز مغرب میں تاخیر ہوگئی نماز سے فراغت کے بعد حضرت ابوایوب ؓ ان کے پاس گئے اور فرمایا اے عقبہ! کیا آپ نے نبی کریم ﷺ کو نماز مغرب اسی طرح پڑھتے ہوئے دیکھا ہے؟ کیا آپ نے نبی کریم ﷺ کو یہ فرماتے ہوئے نہیں سنا کہ میری امت اس وقت تک خیر پر رہے گی جب تک وہ نماز مغرب کو ستاروں کے نکلنے تک مؤخر نہیں کرے گی؟