حضرت براء بن عازب ؓ کی مرویات
حضرت براء ؓ سے مروی ہے کہ حجۃ الوداع کے موقع پر نبی کریم ﷺ اپنے صحابہ ؓ کے ساتھ روانہ ہوئے ہم نے حج کا احرام باندھ لیاجب ہم مکہ مکرمہ پہنچے تو نبی کریم ﷺ نے فرمایا اپنے حج کے اس احرام کو عمرے سے بدل لولوگ کہنے لگے یا رسول اللہ! ہم نے تو حج کا احرام باندھ رکھا ہے ہم اسے عمرے میں کیسے تبدیل کرسکتے ہیں؟ نبی کریم ﷺ نے فرمایا میں تمہیں جو حکم دے رہا ہوں اس کے مطابق عمل کرو کچھ لوگوں نے پھر وہی بات دہرائی تو نبی کریم ﷺ غصے میں آکر وہاں سے چلے گئے اور حضرت عائشہ ؓ کے پاس اسی غصے کی کیفیت میں پہنچے انہوں نے نبی کریم ﷺ کے چہرے پر غصے کے آثار دیکھے تو کہنے لگیں کہ آپ کو کس نے غصہ دلایا؟ اللہ اس پر اپنا غصہ اتارے نبی کریم ﷺ نے فرمایا میں کیوں غصے میں نہ آؤں جبکہ میں ایک کام کا حکم دے رہا ہوں اور میری بات نہیں مانی جارہی۔