حضرت عبداللہ بن حوالہ ؓ کی حدیثیں
حضرت ابن حوالہ ؓ سے مروی ہے کہ نبی ﷺ نے ارشاد فرمایا عنقریب معاملہ اتنا بڑھ جائے گا کہ بیشمار لشکر تیار ہوجائیں گے چناچہ ایک لشکر شام میں ہوگا، ایک یمن میں اور ایک عراق میں، ابن حوالہ ؓ نے عرض کی یا رسول اللہ! ﷺ اگر میں اس زمانے کو پاؤں تو مجھے کوئی منتخب راستہ بتا دیجئے؟ نبی ﷺ نے فرمایا شام کو اپنے اوپر لازم کرلینا، کیونکہ وہ اللہ کی بہترین زمین ہے، جس کے لئے وہ اپنے منتخب بندوں کو چنتا ہے، اگر یہ نہ کرسکو تو پھر یمن کو اپنے اوپر لازم کرلینا اور لوگوں کو اپنے حوضوں سے پانی پلاتے رہنا کیونکہ اللہ تعالیٰ نے میرے لئے اہل شام اور ملک شام کی کفالت اپنے ذمے لے رکھی ہے۔