حضرت خالد بن ولید ؓ کی حدیثیں
حضرت خالد بن ولید ؓ سے مروی ہے کہ ایک مرتبہ میرے اور عمار بن یاسر کے درمیان کسی بات پر تکرار ہو رہی تھی کہ میں نے انہیں کوئی تلخ جملہ کہہ دیا، حضرت عمار ؓ وہاں سے نبی ﷺ کی خدمت میں شکایت کے لئے چلے گئے، حضرت خالد ؓ بھی وہاں پہنچ گئے، دیکھا کہ وہ نبی ﷺ سے ان کی شکایت کر رہے ہیں تو ان کے لہجے میں مزید تلخی پیدا ہوگئی، نبی ﷺ خاموش رہے، کچھ بھی نہ بولے تو حضرت عمار ؓ رونے لگے اور کہنے لگے یا رسول اللہ! ﷺ کیا آپ انہیں دیکھ نہیں رہے؟ نبی صلی اللہ علیہ نے اپنا سر اٹھایا اور فرمایا جو شخص عمار سے دشمنی کرتا ہے، اللہ اس سے دشمنی کرتا ہے اور جو عمار سے نفرت کرتا، اللہ بھی اس سے نفرت کرتا ہے۔ حضرت خالد ؓ کہتے ہیں کہ جب میں وہاں سے نکلا تو مجھے عمار کو راضی کرنے سے زیادہ کوئی چیز محبوب نہ تھی، چناچہ میں ان سے ملا اور وہ راضی ہوگئے۔