حضرت ابن اکوع کی بقیہ مرویات
حضرت سلمہ بن اکوع ؓ سے مروی ہے کہ ایک مرتبہ وہ مدینہ منورہ آئے، تو حضرت بریدہ بن حصیب سے ملاقات ہوئی وہ کہنے لگے اے سلمہ! کیا تم اپنی ہجرت سے پیٹھ پھیر چکے ہو؟ (کہ صحراء میں رہنا شروع کردیا ہے) انہوں نے بتایا کہ مجھے نبی ﷺ کی طرف سے اجازت ہے، میں نے نبی ﷺ کو یہ فرماتے ہوئے سنا ہے اے قبیلہ اسلم! دیہات میں رہو اور صاف ستھری آب وہوا پاؤ اور گھاٹیوں میں رہو، لوگوں نے عرض کیا یا رسول اللہ! ہمیں اندیشہ ہے کہ کہیں اس سے ہماری ہجرت کو نقصان نہ پہنچے؟ نبی ﷺ نے فرمایا تم جہاں بھی رہو گے مہاجر ہی رہو گے۔