حضرت عبداللہ بن عمر ؓ کی مرویات
حضرت ابن عمر ؓ سے مروی ہے کہ ایک مرتبہ حضرت عمر ؓ نے عطارد کو کچھ ریشمی جوڑے بیچتے ہوئے دیکھا تو بارگارہ رسالت میں حاضر ہوئے اور عرض کیا یا رسول اللہ میں نے عطارد کو ریشمی جوڑے بیچتے ہوئے دیکھا ہے اگر آپ اس میں سے ایک جوڑا خرید لیتے تو وفود کے سامنے اور عید اور جمعہ کے موقع پر پہن لیتے نبی کریم ﷺ نے فرمایا یہ وہ شخص پہنتا ہے جس کا کوئی آخرت میں حصہ نہ ہو۔ کچھ عرصے بعد نبی کریم ﷺ کی خدمت میں کہیں سے کچھ ریشمی جوڑے آگئے نبی کریم ﷺ نے ان میں سے ایک جوڑا حضرت علی ؓ کودے دیا ایک حضرت اسامہ ؓ کودے دیا اور ایک حضرت عمر ؓ کو بھجوا دیا اور حضرت علی ؓ سے فرمایا اسے پھاڑ کر اس کے دوپٹے عورتوں میں تقسیم کردو اسی اثنا میں حضرت عمر ؓ بارگاہ رسالت میں حاضر ہو کر کہنے لگے یا رسول اللہ میں نے ریشم کے متعلق آپ کو جو فرماتے ہوئے سنا تھا وہ آپ ہی نے فرمایا تھا اور پھر آپ ہی نے مجھے یہ جوڑا بھیج دیا؟ نبی کریم ﷺ نے فرمایا میں نے اسے تمہارے پاس اس لئے نہیں بھیجا کہ تم اسے پہن لو بلکہ اس لئے بھیجا ہے کہ تم اسے فروخت کر لوجب کہ حضرت اسامہ ؓ نے وہ جوڑا پہن لیا اور باہر نکل آئے نبی کریم ﷺ انہیں تیز نظروں سے دیکھنے لگے جب حضرت اسامہ ؓ نے دیکھا کہ نبی کریم ﷺ انہیں گھور کر دیکھ رہے ہیں تو کہنے لگے یا رسول اللہ آپ ہی نے مجھے یہ لباس پہنایا ہے نبی کریم ﷺ نے فرمایا اسے پھاڑ کر عورتوں کے درمیان دوپٹے تقسیم کردو یا جیسے نبی کریم ﷺ نے فرمایا۔