حضرت عبداللہ بن عمر ؓ کی مرویات
حضرت ابن عمر ؓ سے مروی ہے کہ ایک مرتبہ نبی کریم ﷺ حضرت فاطمہ ؓ کے یہاں گئے ان کے گھر کے دروازے پر پردہ لٹکا ہوا دیکھا تو وہیں سے واپس ہوگئے بہت کم ایسا ہوا ہوتا تھا کہ نبی کریم ﷺ ان کے یہاں جاتے اور ان سے ابتداء نہ کرتے الغرض! تھوڑی دیر بعد حضرت علی ؓ آئے تو حضرت فاطمہ ؓ غمگین دکھائی دیں انہوں نے پوچھا کیا ہوا؟ وہ بولیں کہ نبی کریم ﷺ تشریف لائے تھے لیکن گھر کے اندر نہیں آئے ( اور باہر سے ہی واپس ہوگئے) حضرت علی ؓ نبی کریم ﷺ کی خدمت میں حاضر ہوئے اور عرض کیا یا رسول اللہ! فاطمہ نے اس چیز کو اپنے اوپر بہت زیادہ محسوس کیا ہے کہ آپ ان کے پاس آئے بھی اور گھر میں داخل نہ ہوئے؟ نبی کریم ﷺ نے فرمایا مجھے دنیا سے کیا غرض مجھے ان منقش پردوں سے کیا غرض؟ یہ سن کر حضرت علی ؓ حضرت فاطمہ ؓ کے پاس گئے اور انہیں نبی کریم ﷺ کا یہ ارشاد سنایا انہوں نے کہا کہ آپ نبی کریم ﷺ سے پوچھیے کہ اب میرے لئے کیا حکم ہے؟ نبی کریم ﷺ نے فرمایا فاطمہ سے کہو کہ اسے بنو فلاں کے پاس بھیج دے۔