حضرت عبداللہ بن مسعود ؓ کی مرویات
ایک مرتبہ علقمہ اور اسود دونوں حضرت ابن مسعود ؓ کی خدمت میں حاضر تھے، نماز کا وقت آیا تو علقمہ اور اسود پیچھے کھڑے ہوگئے، حضرت ابن مسعود ؓ نے ان کے ہاتھ پکڑے اور ایک کو اپنی دائیں جانب اور دوسرے کو اپنی بائیں جانب کھڑا کرلیا، پھر جب ان دونوں نے رکوع کیا تو اپنے ہاتھ گھٹنوں پر رکھ لئے، حضرت ابن مسعود ؓ نے یہ دیکھ کر ان کے ہاتھوں کو مارا اور اپنے دونوں ہاتھوں کو جوڑ کر ایک دوسرے میں انگلیاں داخل کردیں اور دونوں ہاتھ اپنی رانوں کے بیچ میں رکھ لئے اور فرمایا کہ میں نے نبی ﷺ کو اسی طرح کرتے ہوئے دیکھا ہے۔ فائدہ: یہ عمل " تطبیق " کہلاتا ہے ابتداء میں رکوع کا یہی طریقہ تھا، بعد میں یہ حکم منسوخ ہوگیا تھا لیکن حضرت ابن مسعود ؓ آخر دم تک اس کے نسخ کے قائل نہ ہوئے۔ گذشتہ حدیث اس دوسری سند سے بھی مروی ہے۔