ام المومنین حضرت عائشہ صدیقہ ؓ کی مرویات
حضرت عائشہ ؓ سے مروی ہے کہ ایک مرتبہ ہمارے یہاں حضرت ام سلمہ ؓ آئی ہوئی تھیں، رات کا کچھ حصہ گذرنے کے بعد نبی ﷺ بھی تشریف لائے اور ان سے دل لگی کرتے ہوئے انہیں ہاتھ سے چھیڑنے لگے، انہیں یہ معلوم نہ تھا کہ وہاں حضرت ام سلمہ ؓ بھی موجود ہیں، میں نبی ﷺ کی طرف اشارے کرنے لگی جس سے نبی ﷺ سمجھ گئے، یہ دیکھ کر حضرت ام سلمہ ؓ نے کہا کیا اب اس طرح ہوگا، کیا ہم میں سے کوئی عورت جب آپ کے پاس خلوت میں ہوتی ہے تو کیا اس طرح ہوتا ہے جیسے میں اب دیکھ رہی ہوں، پھر وہ حضرت عائشہ ؓ کو سخت ست کہنے لگیں، نبی ﷺ انہیں روکنے کی کوشش کرتے رہے لیکن وہ نہ مانیں، تو نبی ﷺ نے مجھ سے فرمایا کہ تم بھی ان سے بدلہ لو، چناچہ میں نے ان سے بدلہ لیا اور ان پر غالب آگئی۔ اس کے بعد حضرت ام سلمہ ؓ وہاں سے حضرت علی ؓ اور فاطمہ ؓ کے پاس گئیں اور انہیں بتایا کہ عائشہ نے انہیں سخت ست کہا ہے اور تمہیں بھی اس طرح کہا ہے، حضرت علی ؓ نے حضرت فاطمہ سے کہا کہ تم نبی ﷺ کے پاس جاؤ اور ان سے کہو کہ عائشہ نے ہمیں اس طرح کہ ہے، وہ نبی ﷺ کی خدمت میں حاضر ہوئی اور ساری بات ذکر کی، نبی ﷺ نے ان سے فرمایا رب کعبہ کی قسم! وہ تمہارے باپ کی چہیتی ہے، اس پر حضرت فاطمہ ؓ واپس حضرت علی ؓ کے پاس چلی گئیں اور ان سے یہ بات ذکر کی کہ نبی ﷺ نے یہ فرمایا ہے، پھر حضرت علی ؓ نے نبی ﷺ سے عرض کیا کہ آپ کے لئے یہ بات کافی نہیں ہے کہ عائشہ نے ہمیں اس اس طرح کہا ہے اور فاطمہ آپ کے پاس آئیں تو آپ نے ان سے کہہ دیا کہ رب کعبہ کی قسم! وہ تمہارے باپ کی چہیتی ہے۔