ام المومنین حضرت عائشہ صدیقہ ؓ کی مرویات
عروہ (رح) حضرت عائشہ ؓ سے کہتے تھے کہ اماں جان! مجھے آپ کی فقاہت پر تعجب نہیں ہوتا کیونکہ میں یہ کہہ سکتا ہوں کہ آپ نبی ﷺ کی بیوی اور حضرت صدیق اکبر ؓ کی بیٹی ہیں، مجھے آپ کے شعر اور ایام ناس کے علم پر بھی تعجب نہیں ہوتا کیونکہ میں کہہ سکتا ہوں کہ آپ حضرت ابوبکر ؓ کی بیٹی ہیں جو کہ تمام لوگوں میں سب سے بڑے عالم تھے، مجھے جو تعجب ہوتا ہے وہ آپ کے علم طب پر ہوتا ہے کہ وہ آپ کو کیسے، کہاں سے اور کیونکر حاصل ہوا؟ انہوں نے ان کے کندھے پر ہاتھ مار کر کہا اے عروہ! نبی ﷺ اپنی زندگی کے آخری ایام میں بیمار ہوگئے تھے، نبی ﷺ کے پاس ہر طرف سے وفود عرب آتے تھے، وہ نبی ﷺ کے لئے مختلف قسم کی چیزیں تشخیص کرتے تھے اور میں ان سے نبی ﷺ کا علاج کرتی تھی، بس وہیں سے یہ چیزیں میں نے حاصل کرلیں۔