حضرت مقداد بن اسود ؓ کی حدیثیں
حضرت مقداد ؓ سے مروی ہے کہ جب ہم لوگ مدینہ منورہ میں آئے تو نبی کریم ﷺ نے ہمیں ایک ایک گھر میں دس دس آدمیوں میں تقسیم کردیا میں ان دس لوگوں میں شامل تھا جن میں نبی کریم ﷺ بھی تھے ہمارے پاس صرف ایک ہی بکری تھی جس سے ہم دودھ حاصل کرتے تھے اگر کسی دن نبی کریم ﷺ کو واپس آنے پر تاخیر ہوجاتی تو ہم اس کا دودھ پی لیتے اور نبی کریم ﷺ کے لئے بچا کر رکھ لیتے۔ ایک مرتبہ رات کو نبی کریم ﷺ تاخیر سے واپس تشریف لائے ہم اس وقت تک سو چکے تھے چونکہ نبی کریم ﷺ کو تاخیر زیادہ ہوگئی تھی اور میرا خیال نہیں تھا کہ نبی کریم ﷺ واپس آئیں گے ہوسکتا ہے کسی نے نبی کریم ﷺ کو دعوت پر بلا لیا ہو یہ سوچ کر میں نے نبی کریم ﷺ کے لئے رکھا ہوا دودھ بھی پی لیا لیکن رات کا کچھ حصہ گذرنے کے بعد نبی کریم ﷺ تشریف لے آئے ادھر مجھے بھی نیند نہیں آرہی تھی نبی کریم ﷺ نے اندر آ کر آہستہ سے سلام کیا اور پیالے کی طرف بڑھے لیکن جب اس میں کچھ نظر نہ آیا تو خاموش ہوگئے پھر فرمایا اے اللہ! جو شخص آج رات ہمیں کھلائے تو اسے کھلا یہ سن کر میں اٹھا چھری پکڑی اور بکری کی طرف بڑھا نبی کریم ﷺ نے پوچھا کیا ہوا میں نے عرض کیا کہ اسے ذبح کرنے جا رہا ہوں نبی کریم ﷺ نے فرمایا اسے ذبح نہ کرو بلکہ اسے میرے پاس لاؤ میں اسے لے کر آیا تو نبی کریم ﷺ نے اس کے تھنوں پر ہاتھ پھیرا تھوڑا سا دودھ نکلا جسے نبی کریم ﷺ نوش فرما کر لیٹ گئے اور سوگئے۔