حضرت عبدالرحمن بن عوف ؓ کی مرویات
حضرت عبداللہ بن عامر ؓ سے مروی ہے کہ حضرت عمر ؓ شام کی طرف روانہ ہوئے جب " سرغ " میں پہنچے تو پتہ چلا کہ شام میں طاعون کی وبا پھیلی ہوئی ہے، تو حضرت عبدالرحمن بن عوف ؓ نے حضرت عمر ؓ کو بتایا کہ نبی ﷺ نے فرمایا ہے جس علاقے میں یہ وباء پھیلی ہوئی ہو، تم وہاں مت جاؤ اور اگر تم کسی علاقے میں ہو اور وہاں یہ وبا پھیل جائے تو وہاں سے نہ نکلو یہ سن کر حضرت عمر ؓ سرغ سے ہی لوٹ آئے۔ حضرت عبداللہ بن عباس ؓ سے مروی ہے کہ حضرت عمر فاروق ؓ ایک مرتبہ شام کی طرف روانہ ہوئے، جب وہ مقام سرغ میں پہنچے تو امراء لشکر حضرت ابوعبیدہ بن الجراح ؓ وغیرہ ان سے ملاقات کے لئے آئے، انہوں نے حضرت عمر ؓ کو بتایا کہ شام میں وبا پھیلی ہوئی ہے اور راوی نے مکمل حدیث ذکر کرنے کے بعد کہا کہ پھر حضرت عبدالرحمن بن عوف ؓ آئے، وہ اپنی کسی ضرورت سے کہیں گئے ہوئے تھے اور کہنے لگے کہ میرے پاس اس کا یقینی علم موجود ہے۔ میں نے نبی ﷺ کو فرماتے ہوئے سنا ہے کہ جب یہ وبا کسی علاقے میں پھیلی ہوئی ہو اور تم وہاں پہلے سے موجود ہو تو وہاں سے راہ فرار مت اختیار کرو اور اگر تم وہاں نہ ہو تو اس علاقے میں جاؤ مت، اس پر حضرت عمر ؓ نے اللہ کا شکر ادا کیا اور واپس لوٹ گئے۔