حضرت صدیق اکبر ؓ کی مرویات
حضرت عائشہ صدیقہ ؓ سے مروی ہے کہ نبی ﷺ کے وصال مبارک کے بعد حضرت فاطمۃ الزہراء ؓ نے حضرت صدیق اکبر ؓ سے درخواست کی کہ مال غنیمت میں سے نبی ﷺ کا جو ترکہ بنتا ہے، اس کی میراث تقسیم کردیں، حضرت صدیق اکبر ؓ نے ان سے فرمایا کہ جناب رسول اللہ ﷺ نے فرمایا ہے کہ ہمارے مال میں وراثت جاری نہیں ہوتی، ہم جو کچھ چھوڑ جاتے ہیں وہ صدقہ ہوتا ہے۔ حضرت فاطمہ ؓ کا اپنے ذہن میں اس پر کچھ بوجھ محسوس ہوا، چناچہ انہوں نے اس معاملے میں حضرت ابوبکر صدیق ؓ سے بات کرنا ہی چھوڑ دی اور یہ سلسلہ حضرت فاطمہ الزہرا ؓ کی وفات تک رہا، یاد رہے کہ حضرت فاطمہ ؓ نبی ﷺ کے بعد صرف چھ ماہ ہی زندہ رہیں۔ اصل میں حضرت فاطمہ ؓ ارض خیبر وفدک میں سے نبی ﷺ کے ترکہ کا مطالبہ کر رہی تھیں، نیز صدقات مدینہ میں سے بھی اپنا حصہ وصول کرنا چاہتی تھیں، حضرت صدیق اکبر ؓ نے اس مطالبے کو پورا کرنے سے معذرت کرتے ہوئے فرمایا کہ نبی ﷺ جس طرح جو کام کرتے تھے، میں اسے چھوڑ نہیں سکتا بلکہ اسی طرح عمل کروں گا جیسے نبی ﷺ فرماتے تھے، اس لئے کہ مجھے اندیشہ ہے کہ اگر میں نے نبی ﷺ کے کسی عمل اور طریقے کو چھوڑا تو میں بہک جاؤں گا۔ بعد میں حضرت عمر فاروق ؓ نے صدقات مدینہ کا انتظام حضرت علی ؓ اور حضرت عباس ؓ کے حوالے کردیا تھا، جس میں حضرت علی ؓ حضرت عباس ؓ پر غالب آگئے، جبکہ خیبر اور فدک کی زمینیں حضرت عمر فاروق ؓ نے خلاف کے زیر انتظام ہی رکھیں اور فرمایا کہ یہ نبی ﷺ کا صدقہ ہیں اور اس کا مصرف پیش آمدہ حقوق اور مشکل حالات ہیں اور ان کی ذمہ داری وہی سنبھالے گا جو خلیفہ ہو، یہی وجہ ہے کہ آج تک ان دونوں کی یہی صورت حال ہے۔