رات کی نماز (تہجد) اور نبی ﷺ کی رات کی نماز کی رکعتوں کی تعداد اور وتر پڑھنے کے بیان میں
احمد بن یونس، زہیر، ابواسحاق، یحییٰ بن یحیی، ابوخیثمہ، ابواسحاق فرماتے ہیں کہ میں نے اسود بن یزید سے ان احادیث کے بارے میں پوچھا جو ان سے حضرت عائشہ ؓ نے رسول اللہ ﷺ کی نماز کے بارے میں بیان کی ہیں، حضرت عائشہ ؓ فرماتی ہیں کہ رسول اللہ ﷺ شروع رات میں سو جاتے اور رات کے آخری حصہ میں جاگتے پھر اگر آپ ﷺ کو اپنی ازواج مطہرات کی طرف کوئی حاجت ہوتی تو اس حاجت کو پورا فرما لیتے پھر آپ ﷺ سو جاتے اور جب پہلی اذان ہوتی تو فورا اٹھ جاتے، اللہ کی قسم! حضرت عائشہ صدیقہ نے یہ نہیں فرمایا کہ کھڑے ہو کر اپنے اوپر پانی بہاتے اور نہ اللہ کی قسم یہ فرمایا کہ آپ ﷺ غسل فرماتے اور میں اچھی طرح جانتا ہوں کہ آپ ﷺ کیا چاہتے اور اگر آپ ﷺ جنبی نہ ہوتے تو آپ ﷺ نماز کے لئے وضو فرماتے پھر دو رکعات نماز پڑھتے۔