کمزور ایمان والے کی تالیف قلب کرنے اور بغٰیر دلیل کے کسی کو مومن نہ کہنے کے بیان میں
ابن ابی عمر، سفیان، زہری، عامر بن سعد اپنے والد سے روایت کرتے ہیں کہ رسول اللہ ﷺ نے کچھ مال تقسیم فرمایا تو میں نے عرض کیا اے اللہ کے رسول ﷺ فلاں کو دیجئے کیونکہ وہ مومن ہے نبی ﷺ نے فرمایا وہ مسلمان ہے ( مومن نہیں ظاہری طور پر عبادت گزار ہے)، میں نے تین مرتبہ عرض کیا کہ وہ مومن ہے اور آپ ﷺ نے تینوں مرتبہ یہی فرمایا کہ وہ مسلمان ہے پھر آپ ﷺ نے فرمایا میں اس آدمی کو دیتا ہوں حالانکہ میں دوسرے کو اس سے زیادہ محبوب رکھتا ہوں صرف اس ڈر سے اسے دیتا ہوں کہ کہیں اللہ اسے منہ کے بل جہنم میں نہ گرا دے۔