انبیاء (علیہ السلام) کے حلیے :
اور حضرت ابن عباس ؓ نبی کریم ﷺ سے روایت کرتے ہیں کہ آپ ﷺ نے فرمایا میں شب معراج میں حضرت موسیٰ (علیہ السلام) کو دیکھا وہ گندم گوں اور دراز قد تھے ان کے بال خمدار تھے اور (جسم وبدن کا اعتبار سے) قبیلہ شنوہ کے کسی آدمی کی طرح نظر آتے تھے اور میں نے عیسیٰ (علیہ السلام) کو دیکھا وہ خلقی طور پر متوسط قدوقامت کے تھے (نہ بہت لمبے تھے نہ ٹھگنے اور نہ بہت موٹے تھے نہ دبلے) ان کا رنگ سرخ سفید تھا (جیسے خود حضور ﷺ کے جسم مبارک کا رنگ تھا) اور ان کے سر کے بال سیدھے (یعنی گھونگھریالے نہیں) تھے اور میں نے دوزخ کے دورغہ مالک کو اور دجال کو بھی دیکھا! اور آنحضرت ﷺ کا ان سب کو دیکھنا قدرت الہٰی کی ان نشانیوں اور علامتوں کے ضمن میں تھا جو اللہ تعالیٰ نے آپ ﷺ کو (شب معراج میں) دیکھائیں اس لئے (اے اس حدیث کو پڑھنے اور سننے والے) اس امر میں کوئی شک وشبہ نہ کر، آنحضرت ﷺ نے ان سب کو دیکھا اور ملاقات فرمائی۔ (بخاری)
تشریح
جعد کے معنی ہیں بالوں کا گھونگھریالہ ہونا۔ اور اس کے مقابلہ پر سبط کے معنی ہیں بالوں کا سیدھا ہونا پس یہاں مراد یہ ہے کہ حضرت موسیٰ (علیہ السلام) کے بال سیدھے نہیں تھے بلکہ خمدار تھے یعنی گھونگھریالے نظر آتے تھے اور حضرت شیخ عبد الحق دہلوی (رح) نے اپنی شرح میں جعد کے تحت لکھا ہے کہ اس لفظ (جعد) کا اکثر اطلاق گھونگھریالے بالوں پر ہوتا ہے مگر کبھی کبھی یہ لفظ مضبوط اور گٹھے ہوئے بدن کے لئے بھی استعمال ہوتا ہے اور یہاں حدیث میں یہ لفظ اسی معنی میں استعمال ہوا ہے یعنی حضرت موسیٰ (علیہ السلام) ایک گٹھے ہوئے بدن کے آدمی تھے۔ حضرت شیخ نے جعد کے یہ معنی مراد لینے کی وجہ یہ لکھی ہے کہ اگلی حدیث میں حضرت موسیٰ (علیہ السلام) کے بارے میں منقول ہے کہ وہ رجل الشعر تھے اور رجل کا اطلاق ایسے بالوں پر ہوتا ہے جو گھونگھریالے نہ ہوں۔ اس کی وضاحت اگلی حدیث میں آرہی ہے۔ روایت کا یہ جملہ فی ایات ارہن اللہ ایاہ آنحضرت ﷺ کے ارشاد کا جزء نہیں ہے، نیز یہ ذریعہ قرآن کریم کی اس آیت کی طرف اشارہ مقصود ہے۔ ولقد اتینا موسیٰ الکتب فلاتکن فی مریۃ من لقاہ اور ہم نے موسیٰ (علیہ السلام) کو کتاب دی تھی، سو (اے محمد ﷺ آپ شب معراج میں) موسیٰ (علیہ السلام) کے ملنے میں کچھ شک نہ کیجئے۔ یعنی آپ موسیٰ (علیہ السلام) سے شب معراج میں ملے تھے، وہ سچی حقیقت ہے کوئی دھوکا یا نظر بندی نہیں۔ لہٰذا مذکورہ جملہ سے اس آیت کی طرف اشارہ کرکے ہر ایک کو آگاہ کیا گیا کہ جب قرآن سے بھی یہ ثابت ہے کہ شب معراج میں آنحضرت ﷺ کا حضرت موسیٰ (علیہ السلام) سے ملنا ایک سچی حقیقت ہے تو کوئی بھی اس شک وشبہ کا شکار نہ ہو۔