مدت رضاعت کے بعد دودھ پینے سے حرمت ثابت نہیں ہوتی
اور ام المؤمنین حضرت عائشہ ؓ سے روایت ہے کہ ایک دن نبی کریم ﷺ ان کے ہاں تشریف لائے تو اس وقت ان کے پاس ایک شخص بیٹھا ہوا تھا اسے دیکھ کر آنحضرت ﷺ کو گویا ناگواری ہوئی۔ حضرت عائشہ کہتی ہیں کہ میں نے آپ ﷺ کی اس ناگواری کو محسوس کر کے عرض کیا کہ یہ میرے دودھ شریک بھائی ہیں آپ ﷺ نے فرمایا کہ دیکھا (یعنی غور کرو اور سوچو) کہ تمہارا بھائی کون ہوسکتا ہے کیونکہ شرعی طور پر رضاعت کا اعتبار بھوک کے وقت ہے ( بخاری ومسلم)
تشریح
آپ ﷺ کے ارشاد کا مطلب یہ تھا کہ دودھ پینے کے احکام اسی صورت میں جاری ہوتے ہیں جب کہ دودھ بطور غذا پلایا جائے اور اس سے بھوک دور کی گئی ہو۔ چناچہ یہ بات خورد سالی یعنی ایام شیرخوارگی ہی میں ہوتی ہے اور شیرخوارگی کی مدت اکثر علماء کے نزدیک دو سال اور امام اعظم ابوحنیفہ کے قول کے مطابق ڈھائی سال کی عمر تک رہتی ہے اس مدت میں بچہ کی غذائی ضرورت و خواہش کا دار و مدار عورت کے دودھ پر ہوتا ہے جب تک وہ دودھ نہیں پیتا اس کی بھوک ختم نہیں ہوتی لہذا حدیث کا حاصل یہ ہوا کہ بڑی عمر میں یعنی مدت رضاعت ختم ہوجانے کے بعد کسی عورت کا دودھ پینے سے حرمت رضاعت ثابت نہیں ہوتی اور وہ شخص جو اس وقت حضرت عائشہ کے پاس بیٹھا ہوا تھا اور جسے حضرت عائشہ نے اپنا دودھ شریک بھائی کہا تھا اس نے دراصل بڑی عمر میں دودھ پیا تھا اور چونکہ بڑی عمر میں دودھ پینے سے حرمت رضاعت ثابت نہیں ہوتی اس لئے آنحضرت ﷺ کو ان کا حضرت عائشہ کے پاس بیٹھنا نا گوار ہوا۔