سچا ایمان و اسلام نجات کی ضمانت ہے
عتبان بن مالکؓ سے روایت ہے (اور وہ رسول اللہ ﷺ کے ان اصحابؓ میں سے ہیں ، جو انصار میں سے غزوہ بدر میں شریک تھے) کہ وہ رسول اللہ ﷺ کی خدمت میں حاضر ہوئے ، اور عرض کیا ، کہ : “میری نگاہ میں فرق آ گیا ہے (یعنی مجھے کم دکھائی دینے لگا ہے) اور میں اپنی قوم کو نماز پڑھاتا ہوں ، سو جب بارشیں ہوتی ہیں اور میرے اور میری قوم والوں کے درمیان جو نالہ ہے ، وہ بہنے لگتا ہے ، تو میں ان کی مسجد تک جا کر نماز نہیں پڑھا سکتا اور یا رسول اللہ ﷺ ! میری یہ خواہش ہے ، کہ حضور میرے یہاں تشریف لائیں اور میرے گھر میں نماز پڑھیں ، تا کہ میں اُسی جگہ کو اپنی مستقل نماز گاہ بنا لوں”۔ کہتے ہیں کہ حضور نے فرمایا : “ان شاء اللہ تعالیٰ میں ایسا کروں گا” ۔ (عتبان کہتے ہیں) کہ صبح ہی کو جب کچھ دن چڑھا تھا رسول اللہ اور ابو بکرؓ میرے یہاں پہنچ گئے ، اور رسول اللہ ﷺ نے اندر آنے کی اجازت چاہی ، میں نے آپ کو اجازت دی ، پس جب آپ گھر میں تشریف لائے ، تو بیٹھے نہیں ، اور مجھ سے فرمایا : “تم اپنے گھر میں سے کون سی جگہ پسند کرتے ہو ، کہ میں وہاں نماز پڑھوں ؟ ” کہتے ہیں کہ میں نے گھر کی ایک جانب کی طرف اشارہ کر دیا ، پس رسول اللہ ﷺ کھڑے ہوئے ، اور اللہ اکبر کہہ کر آپ نے نماز شروع کر دی ، ہم بھی صف باندھ کے آپ کے پیچھے کھڑے ہو گئے ، پس آپ نے دو رکعتیں پڑھیں ، اور سلام پھیر دیا ، (عتبان کہتے ہیں) اور ہم نے آپ کو خزیرہ (۱) کھانے کے لئے روک لیا ، جو آپ کے واسطے ہم نے تیار کیا تھا ، اور (آپ کی اطلاع پا کے) محلہ والوں میں سے بھی چند آدمی آ کے جڑ گئے ، پس انہی میں سے کسی کہنے والے نے کہا ، کہ مالک بن دخیشن (یا ابنِ دخشن) کہاں ہے؟ انہی میں سے کسی نے جواب دیا ، کہ “وہ تو منافق ہے ، اللہ اور اس کے رسول سے اُسے محبت ہی نہیں ہے”۔ پس رسول اللہ ﷺ نے فرمایا : “یہ مت کہو ! کیا تم نہیں دیکھتے ہو کہ وہ “لَا إِلَهَ إِلَّا اللهُ” کا قائل ہے ، اور اس سے وہ اللہ کی رضا ہی چاہتا ہے”۔ اس کہنے والے شخص نے کہا ، کہ “اللہ اور اس کے رسول ہی کو زیادہ علم ہے ، ہم تو اُس کا رخ اور اُس کی خیر خواہی منافقوں کی طرف دیکھتے ہیں”۔ رسول اللہ ﷺ نے ارشاد فرمایا : “یقیناً اللہ عز وجل نے دوزخ کی آگ پر اُس شخص کو حرام کر دیا ہے ، جس نے اخلاص کے ساتھ لَا إِلَهَ إِلَّا اللهُ” کہا ہو ، اور اُس کا ارادہ اس کلمہ سے اللہ تعالی کی رضا مندی حاصل کرنا ہی ہو ”
تشریح
اس حدیث میں بھی “لَا إِلَهَ إِلَّا اللهُ ” کہنے والے پر آتشِ دوزخ حرام ہونے کا مطلب وہی ہے ، جو اسی مضمون کی سابقہ احادیث کی تشریح کے ضمن میں تفصیل سے لکھا جا چکا ہے ۔ بلکہ اس حدیث کی صحیح مسلم کی روایت میں بجائے “لَا إِلَهَ إِلَّا اللهُ ” کے “يشهد ان لَا إِلَهَ إِلَّا اللهُ وانى رَسُولُ اللهِ ” ہے اور مراد ان دونوں ہی عنوانوں سے دعوتِ اسلام کو قبول کرنا اور دین اسلام کو بحیثیت دین کے اختیار کر لینا ہے ، دراصل جیسا کہ پہلے عرض کیا جا چکا ہے عہدِ نبوی میں اسلام قبول کرنے اور اسلام کو اختیار کرنے کی یہ عام تعبیر رتھی ۔
یہاں ایک بات یہ بھی ملحوظ رکھنی چاہیے ، کہ جن صحابی نے مالک بنِ دخشن کو منافق کہا تھا ، اُن کی نظر میں بھی مالک بنِ دخشن میں نفاق یا فسق و فجور کی کوئی بات اس کے سوا نہ تھی ، کہ اُن کے خیال میں مالک بنِ دخشن ، منافقین سے تعلقات اور میل ملاقات رکھتے تھے ۔
اس سے ایک طرف تو صحابہ کرامؓ کے ایمانی جذبے کا اندازہ ہوتا ہے ، کہ وہ اتنہ سی بات سے بھی اس قدر ناراض ہوتے تھے ، اور اس کو منافقت سمجھتے تھے ۔ اور دوسری طرف آنحضرتﷺ کی تنبیہ سے سبق ملتا ہے کہ جن لوگوں میں اس طرح کی کچھ کمزوریاں ہوں ، مگر اپنے ایمان اور توحید و رسالت کی شہادت میں وہ مخلص ہوں ، تو ان کے بارے میں ایسی بدگمانیاں اور اتنی سخت باتیں کرنی جائز نہیں ، بلکہ ایمان کا پہلو زیادہ قابلِ لحاظ اور واجب الاحترام ہے ۔
یہ بھی یاد رہنا چاہیے کہ یہ مالک بن دخیشن بھی رسول اللہ ﷺ کے اُن صحابہ میں سے ہیں ، جو عام غزوات میں حتی کہ بدر میں بھی شریک رہے ہیں ، ممکن ہے کہ منافقین سے تعلقات رکھنے میں ، حاطب بنِ ابھی بلتعہؓ کی طرح ان کی بھی کچھ مجبوریاں ہوں ۔ واللہ اعلم ۔